Извештај: Install Fest 2004

Викендов, Слободен Софтвер Македонија организираше Install и Burn Fest во просториите на градското собрание во Скопје. Настанот траеше два дена, од 11 до 20 часот. Важно е да се напомене дека интересот беше навистина огромен и дека уште првиот ден беа надминати сите наши очекувања. Накратко, исходот од овогодинешниот Install & Burn Fest беше: 11 успешно инсталирани и конфигурирани машини и над 200 снимени цд-а со GNU/Linux дистрибуции и друг слободен софтвер. На сите заинтересирани посетители им беа понудени следниве неколку GNU/Linux дистрибуции: Mandrake 10, Fedora Core 2, Slackware 9.1, Debian 3.0, Slax и Knoppix 3.4, но помеѓу посетителите, најголем интерес се појави за Mandrake 10 и Slackware 9.1. Овие дистрибуции се токму двете кои што беа и највеќе инсталирани. Друг слободен софтвер кој што беше понуден на сите заинтересирани беше и The Open CD, OpenOffice.org на македонски и англиски јазик, Mozilla пакетот, Mozilla Firefox и Mozilla Thunderbird. Првиот ден од Install Fest-от беше снимен и од екипата на емисијата „Ентер“, а нивниот прилог во врска со Install Fest-от ќе можете да го проследите пред саботните вести во 19.00 часот, на А1 телевизија. На настанот повеќепати беше прикажуван и документарниот филм „RevolutionOS“. Мое мислење е дека ако се споредиме со минатонеделниот Install Fest организиран во Египет (Каиро) можеме да дојдеме до заклучокот дека овој Install Fest е успешно организиран настан за град во кој што живеат 500,000 жители. :) Сигурни сме дека и во иднина ќе се организираат вакви и слични настани се со цел да се приближат предностите на слободниот софтвер и оперативниот систем GNU/Linux до сите заинтересирани корисници во Република Македонија. Галеријата на слики можете да ја погледнете овде.