Македонските е-банки ги туркаат своите кори

Откако е извршена трансформација на Заводот за платен промет (понатаму во текстов ЗПП) институција повеќе позната како СОК (Служба за Општествено Книговодство), платниот промет го презедоа деловните банки во земјава...Во самиот почеток плаќањата се вршеа на лице место во нивните експозитури, што секако беше огромна предност во споредба со ЗПП : ЗПП во Скопје имаше три експозитури - Центар, Ѓорче Петров и Автокоманда, а само Комерцијална Банка на пример во Скопје има околу 15 експозитури. За многу кратко време поедини банки се досетија како да ги смалат турканиците на нивните шалтери : Решението е во компјутерите ! Комерцијална банка беше (според сеќавањето на потписникот на овие редови) прва која воведе компјутерско добивање изводи од жиро сметката, и тоа преку нивните веб страници. Одлично решение за мултиплатформска поддршка ! Тоа беше мојата првична реакција. Кога во банката ми одговорија дека од Linux, за сега, нема да можам да го користам нивниот сервис, мојата радост спласна, но сепак ... Windows во Македонија е исто така "бесплатен" за сега, си реков и на тоа остана. Пробав да си видам извод од Windows, но преку друг браузер - Опера, и замислете ... Неможе. Истото е и со Нетскејп. Значи мора со МСИЕ. Поминаа неколку години, Windowsot ниту во наводници веќе не е бесплатен. Но банката и нејзиниот сервис останаа на "за сега". Охридска Банка во речиси исто време воведе електронско банкарство и тоа дури понапредно од Комерцијална Банка : Не само гледање изводи, туку и плаќање ! Корисникот преку својот модем се врзува директно на серверот на банката(во Охрид), и користи што сака : плаќа, гледа промет на својата жиро сметка, и се тоа во реално време го овозможува апликација изработена од тим на банката. Единствени две маани : 1.Мора да користи меѓуградски телефонски импулс додека го користи сервисот. 2.Работи само во Windows. За Линукс-от ,ми беше одговoрено како и во Комерцијална Банка-За сега... По неколку поминати години, и оваа банка се уште е за сега... Не би знаел колку точно време помина кога - и Тутунска банка понуди сервис речиси исти како тој на Охридска Банка, со апликација изработена од тим на банката во соработка со Македонската фирма за развој на софтвер-Пексим. Разликата е во тоа што конекцијата оди преку интернет. Тоа значи поевтин телефонски импулс за корисникот. А поддршка за други оперативни системи, конкретно за Линукс - до денес нема. Се наметнуваат следниве заклучоци : 1. Нашиве банки ќе не принудат да платиме за оперативен систем кој не е неопходен за да ги користиме нивните сервиси или ќе мора да се вратиме во времето на ЗПП - и ќе одиме на лице место за да плаќаме. 2. За да биде изработен софтвер во Windows нивните тимови најверојатно користат алатки oд Мајкрософт, значи плаќаат скапо. Од каде да си ги повратат парите ? Па, нормално од свој џеб. Корисникот е принуден да плати за Windows-от, а него не го продаваат банките. Би било добро Ние, корисниците и поддржувачи на слободен софтвер, да и објасниме на јавноста за оваа потенцијална опасност, и истовремено да извршиме притисок врз банките во врска со истиот проблем. Најпосле, се работи за голем број џебови, на кои заштедата за цената на Windows-от многу ќе им значи.