Fedora Core 1

Само што инсталирав Fedora Core 1 (Yarrow). Fedora Linux би требало да претставува продолжение на Red Hat Linux 9, односно Red Hat 9.x или 10. Преку овој краток преглед ќе се обидам да ви ги пренесам моите импресии од Fedora Core 1...

Ја користев првата бета на Fedora веќе два месеца и иако бев доста запознаен со новините што требаше да дојдат со објавувањето на финалната верзија, морам да признаам дека многу работи во Core 1 ми дојдоа како изненадување.

Fedora можете да ја преземете од ftp серверот на red hat или од некој од следниве mirror сервери.

Да почнеме од инсталацијата. Fedora користи, ајде да речам „федоризирана“ верзија на red hat anaconda инсталерот. Инсталацијата помина без проблеми. За разлика од rh9, со Fedora на крајот добив и конфигурирана ATI Radeon Mobility U1 графичка картица. Доста фино земајќи в предвид дека во rh9 и Debian се испомалтретирав за да подигнам X!

По успешно завршената инсталација, доаѓа „firstboot“. Оние од вас кои што користеле red hat 8 и 9 сигурно се запознаени со „firstboot“. За оние што не се запознаени: „firstboot“ е апликација која што се стартува веднаш по инсталацијата, значи на првото подигнување на веќе инсталираниот систем, и ви помага при додавањето на корисници на системот, конфигурирање на звучната картица, додавање на додатен софтвер итн.

Стигнавме и до мојот омилен дел, Yum!
Yum е програмче слично на apt-get за Debian. Значи работи во конзола и со едноставно внесување на yum install <името на пакетот>, yum се врзува за претходно зададениот сервер и го превзема пакетот заедно со сите потребни пакети за нормално функционирање на истиот. Со yum можете да им речете чао чао на проблемите со dependencies во redhat!

Стандардна тема за Gnome и KDE е новата Bluecurve тема, која во споредба со старата и не е толку лоша... Друго: Нов splash екран, нова gdm тема и нова fedora позадина, додека иконите остануваат истите од претходниот Bluecurve.

Xmms повторно доаѓа без поддршка за mp3 форматот, а проблемот можете да го исправите со преземање на пакетов.

Толку од краткиот преглед. Повеќе информации можете да најдете на http://fedora.redhat.com. Доколку ви треба било каква помош во врска со Fedora можете да се закачите на irc.freenode.net, и да побарате помош на #fedora.

Се на се, Fedora е дефинитивно подобра од нејзините претходници. Верувам дека доволно ќе биде малку да се дотера yum за да Debian го добие својот прв ривал!

Слики од екранот:
- прво подигнување (сопствени подесувања)
- yum во акција
- уште една слика од десктопот